سونے، چاندی اور قیمتی جواہرات سے مزین قرآنِ پاک کی نمائش

کازان … جس طرح خدا تعالیٰ سے محبت جتانے کیلئے کوئی پیمانہ مقرر نہیں، اسی طرح اس کے رسول ﷺ پر نازل کئے گئے قرآنِ پاک سے مسلمانوں کی عقیدت و محبت کا بھی کوئی ثانی نہیں۔ خدا کی کتاب سے بے مثال محبت کا نظارہ روس کے جمہوریہ تاتارستان کے دارالحکومت کازان میں دیکھنے کو ملا، جہاں دنیا کا سب سے بڑا قرآن وہاں کی مرکزی مسجدمیں نمائش کے لئے رکھا گیا ہے۔ ایک اطالوی کمپنی سے تیار کروائے گئے 632 صفحات پر مشتمل اس قرآن ِ پاک کا وزن 800 کلو گرام ہے جو 1.5 میٹر چوڑا اور 2 میٹر لمبا ہے۔ ایک سال کے عرصے میں تیار ہونے والے اس قرآنِ پاک کے سر ورق پر سونے اور چاندی کی تہہ کیساتھ ساتھ فیروزے اور مرمرِ سبز سمیت کئی قیمتی جواہرات جڑے ہوئے ہیں جس کی تیاری پر کم و بیش 1.3 ملین ڈالر لاگت آئی ہے۔