پاکستان کو ادائیگیوں میں پابندیوں ، تعلقات پر منفی اثرپڑرہا ہے،اوباما انتظامیہ

واشنگٹن…اوباما انتظامیہ نے کانگریس کو خبر دار کیا ہے کہ پاکستان پر عائد بعض پابندیوں کی وجہ سے افغانستان میں دہشت گردی کے خلاف امریکا کی جنگ خطرے پڑسکتی ہے۔ وائٹ ہاوٴس نے پالیسی بیان میں ارکانِ کانگریس کو آگاہ کیا ہے کہ پاکستان کو ادائیگیوں میں بعض پابندیوں کی وجہ سے پاک امریکا تعلقات پر منفی اثرات پڑرہے ہیں۔ بیان کے مطابق وائٹ ہاوٴس کو نیشنل ڈیفنس اتھارائزیشن ایکٹ کی دفعہ 1216 کے تحت درکار سرٹیفکیشن پر شدید اعتراضات ہیں۔ سیکشن 1216 میں کہا گیا ہے کہ جس دوران نیٹو سپلائی لائنز بند رہیں اس مدت کے لئے پاکستان کو ادائیگی نہ کی جائے۔ وائٹ ہاوٴس کے مطابق تصدیق کی شرائط میں یہ بھی شامل ہے کہ وزیر دفاع ان معاملات پر پاکستان کے تعاون کی تصدیق کریں جو ان کے دائرہ کار سے باہر ہیں۔ بیان میں کہا گیا ہے کہ موجودہ نازک وقت میں مختلف امور پر تصدیق کی شرائط سے افغانستان میں امریکی جنگ کی کامیابی خطرے میں پڑجائے گی۔