دوہری شہریت: رضا ہارون، محمد علی شاہ سمیت 6 ارکان سندھ اسمبلی مستعفی

کراچی … دوہری شہریت کے معاملے پر 4 صوبائی وزراء سمیت سندھ اسمبلی کے 6 ارکان نے استعفے دے دیئے، اسپیکر نے منظوری کے بعد تمام ارکان کے استعفے الیکشن کمیشن پاکستان کو بھجوادیئے۔ نمائندہ جیو نیوز طارق معین صدیقی نے بتایا ہے کہ 4 صوبائی وزراء سمیت سندھ اسمبلی کے 6 ممبران نے اپنے استعفے اسپیکر کو بھجوادیئے ہیں، مستعفی ہونے والوں میں ایم کیو ایم کے رضا ہارون، محمد علی شاہ، عسکری تقوی، عبدالمعید اور پیپلزپارٹی کے مراد علی شاہ اور صادق میمن شامل ہیں۔ نمائندہ جیو نیوز کے مطابق صوبائی الیکشن کمشنر سونو خان بلوچ نے تصدیق کی ہے کہ اسپیکر سندھ اسمبلی نے 6 ارکان کے استعفے منظوری کے بعد الیکشن کمیشن کو بھجوائے ہیں۔ ذرائع کے مطابق ارکان سندھ اسمبلی کے استعفوں میں دوہری شہریت سے متعلق کچھ واضح نہیں کیا گیا ہے۔ ذرائع کے مطابق ان تمام افراد نے دوہری شہریت سے متعلق حلف نامے الیکشن کمیشن میں جمع نہیں کرائے تھے اور اسمبلی رکنیت سے استعفیٰ اسی وجہ سے دیا گیا ہے۔ واضح رہے کہ الیکشن کمیشن نے دوہری شہریت سے متعلق ارکان پارلیمنٹ اور صوبائی اسمبلیوں کو 30 نومبر تک حلف نامے جمع کرانے کی ہدایت کی تھی۔