حامدمیرکی رانامارکیٹ آمد، جیونیوزکو کلوز سرکٹ کیمرہ فوٹیج موصول

اسلام آباد…اسلام آبادکے علاقے ایف سیون کی رانامارکیٹ میں سینئر اینکر پرسن، معروف کالم نگار اور صحافی حامد میر کی آمد اور مشکوک شخص کی کلوز سرکٹ کیمرہ فوٹیج جیونیوزکوموصول ہوگئی ہے۔ فوٹیج میں دیکھا جاسکتا ہے کہ ایک مشکوک شخص 10 بج کر 47 منٹ پر رانا مارکیٹ میں داخل ہوتا ہے، اُس کے ہاتھ میں ایک کالابیگ موجودہے، جس میں سے کچھ باہر لٹک رہاہے۔ سینئراینکرحامد میر کی گاڑی میں نصب دھماکہ خیزموادکے ساتھ بھی کچھ ایساہی لٹکتادکھائی دے رہاتھا۔ یہ شخص اُس طرف جا رہا ہے جہاں پانچ منٹ کے بعد حامد میر پہنچے۔ 10 بج کر 52 منٹ پر حامد میر کی گاڑی رانا مارکیٹ میں داخل ہوتی ہے اور 10 بج کر 55 منٹ پر واپسی چلی جاتی ہے۔ یہی گاڑی 11 بج کر 13 منٹ پر پھر داخل ہوتی ہے اور حامد میر یہاں آدھا گھنٹہ رُکتے ہیں۔ فوٹیج دیکھنے سے کئی سوالات ذہن میں آتے ہیں۔ یہ شخص کون ہے؟کیا اسے حامد میر کو ٹارگٹ کرنا تھا اور اُسے حامد میر کی آمد کا پہلے سے علم کیسے تھا۔ اُس کے ہاتھ میں کیا ہیاور یہ کس طرف رواں دواں ہے۔رانا مارکیٹ اور جناح سپر مارکیٹ میں لگے باقی کیمروں کی فوٹیج کہاں گئی۔ پولیس ذرائع کے مطابق جناح سپر مارکیٹ کی فوٹیج میں کوئی مشکوک شخص نظر نہیں آیا۔