پرینکا چوپڑا کریں گی مکے بازی

بالی وڈ کے نامور ہدایت کار سنجے لیلا بھنسالی بھارتی مکے باز اور اولمپئین ایم سی میری کام کی زندگی پر ایک فلم بنارہے ہیں جس میں پرینکا چوپڑا میری کام کا کردار ادا کریں گی۔
چند مہینوں قبل جب سنجے لیلا بھنسالی نے میری کام کی زندگی پر فلم بنانے کا اعلان کیا تھا تو سب لوگ یہ قیاس آرائیاں کرنے میں مصروف ہوگئے تھے کہ آخر بالی وڈ کی موجودہ اداکاراؤں میں وہ کون سی اداکارہ ہوگی جو میری کام کا کردار کرے گی۔
آخر کار اس بات کا اعلان کردیا گیا ہے کہ پرینکا چوپڑا کو اس کردار کے لیے منتخب کر لیا گیا ہے۔ اطلاعات کے مطابق میری کام اس خبر سے بے حد خوش ہیں کیونکہ پرینکا چوپڑا میری کام کی پسندیدہ اداکاروں میں سے ایک ہیں۔
اطلاعات کے مطابق پرینکا چوپڑا نے کہا ہے کہ فلم کی شوٹنگ سے پہلے وہ میری کام سے مکے بازی کی تربیت لیں گی اور میری کام کے ساتھ وقت گزارنا پسند کریں گی تاکہ وہ اپنی اداکاری کو حقیقت کا رنگ دے سکیں۔
پرینکا چوپڑا بہت باصلاحیت اداکارہ ہیں۔ ان کی مشہور فلموں میں ’فیشن،‘ ’برفی‘ اور ’سات خون معاف‘ قابل ذکر ہیں۔
پرینکا کے انتخاب پر میری کام کا کہنا تھا ’پرینکا ایک بے حد باصلاحیت اداکارہ ہیں۔ مجھے اس بات کی بے حد خوشی ہے کہ وہ میرا کردار ادا کریں گی۔‘
وہیں پرینکا چوپڑا نے ٹویٹ کیا ہے کہ ’مجھے اس بات کی بے حد خوشی ہے کہ میں میری کام سے ملاقات کروں۔ میں ان سے مکے بازی کا ہنر سیکھوں گی۔‘

میری کام بالی وڈ اور فیشن کی دنیا میں کافی مقبول ہیں
قیاس آرائیاں تھیں کہ میری کام بھی اس فلم میں اداکاری کریں گی۔ اس کے جواب میں میری کام کا کہنا ہے، ’اداکاری میرے لیے بہت مشکل کام ہے۔ میں کیمرے کے سامنے بے حد نروس محسوس کرنے لگتی ہوں۔‘
میری کام چاہتی ہیں کہ وہ فلم کے یونٹ کو ریاست منی پور بلائیں اور انہیں وہاں اپنی زندگی کے بارے میں بتائیں۔
واضح رہے کہ میری کام نےاس برس ہونے والے لندن اولمپکس میں کانسی کا تمغا جیتا تھا اور وہ پانچ بار عالمی باکسنگ چیمپئین رہ چکی ہیں۔
باکسنگ کے علاوہ میری کام ایک اچھی گلوکارہ بھی ہیں۔
لندن اولمپکس میں کانسی کا تمغا جیتنے کے بعد سے ان کی مقبولیت میں بے حد اضافہ ہوا ہے۔ البتہ پروڈیوسر ڈائریکٹر سنجے لیلا بھنسالی کا کہنا ہے کہ انہوں نے لندن اولمپکس سے پہلے ہی میری کام کی زندگی پر مبنی فلم بنانے کا فیصلہ کرلیا تھا۔