کراچی: ڈیفنس میں کار بے قابو ہوکر دیوار توڑتی ہوئی گھر میں جاگھسی

کراچی … کراچی کے علاقے ڈیفنس میں تیز رفتار گاڑی ڈرائیور سے بے قابو ہوکر رکشہ اور بجلی کے کھمبے کو روندتی ہوئی رہائشی مکان کی دیوار توڑ کر گھر میں جا گھسی۔ پولیس کے مطابق ڈیفنس خیابان اتحاد پر تیز رفتار گاڑی ڈرائیور سے بے قابو ہوتے ہوئے رکشہ، فٹ پاتھ اور کھمبے کو توڑتے ہوئے رہائشی مکان کی دیوار توڑ کر گھر میں گھس گئی۔ عینی شاہدین اور حادثے کا شکار ہونے والے رکشہ ڈرائیور کے مطابق تیز رفتار گاڑی میں 2 مرد اور ایک خاتون سوار تھے، جنہیں حادثے کا شکار ہونے والی گاڑی میں سے نکالنے کے بعد پیچھے سے آنے والی گاڑی میں روانہ کردیا گیا، کیونکہ حادثے کے بعد گاڑی میں آگ بھی لگ گئی تھی۔ ڈی ایچ اے لفٹر کی مدد سے حادثے کا شکار ہونے والی گاڑی اور رکشے کو اٹھاکر گزری پولیس اسٹیشن منتقل کردیا گیا ہے۔