جڑواں بچوں کی قبل از وقت پیدائش، نئی طبی تاریخ رقم

لیسسٹر شائر/این جی ٹی…معجزہ کہیں بھی اور کسی بھی وقت ہوسکتا ہے اور ایسا ہی ایک معجزہ گذشتہ دنوں برطانوی کاؤنٹی لیسسٹر شائرمیں دیکھنے کو ملا۔لیسسٹر شائر کے قصبے میں ایما اور ٹام پرکنز نامی جوڑے کے ہاں جڑواں بچوں کی قبل از وقت پیدائش نے طبی ماہرین کے درمیان ان کے زندہ بچ جانے کی اُمید کے حوالے سے نئی بحث چھیڑ دی۔ انتہائی مختصر مدت کے حمل کے بعد5ماہ قبل از وقت اور5دن کے وقفے سے پیدا ہونے والے ایلفی اور ایکزل نامی ان جڑواں لڑکوں کا وزن4پونڈ سے بھی کم تھا۔ پیدائشی طور پرکئی طبی پیچیدگیوں کا شکار ان بچوں نے کئی ماہ زندگی بچانے والی مشینوں پر رہ کر گزارے، جنہیں مکمل تندرستی کے بعد والدین کے سپرد کرکے گھر لے جانے کی اجازت دے دی گئی۔ انتہائی قبل از وقت پیدا ہونے والے ان جڑوان بچوں نے زندہ رہتے ہوئے نئی طبی تاریخ رقم کردی ہے۔