بنوں حملہ:3پولیس اہلکار اور فوجی سمیت9شہید،4خودکش بمبار بھی ہلاک

بنوں…بنوں میں آج صبح فجر کے وقت تھانے پر پانچ خودکش بمباروں نے حملہ کیا۔ اس حملے میں تین پولیس اہلکاروں اور ایک فوجی جوان سمیت 9 افراد شہید ہوئے۔ چار خودکش حملہ آور بھی دھماکے سے ہلاک ہوگئے۔جبکہ ایک بھاگ نکلا۔بنوں میں تھانے پر شدت پسندوں نے صبح سوا چھ بجے حملہ کیا ۔ پانچ حملہ آورفائرنگ کرتے ہوئے بنوں کے تھانہ ککی پہنچے۔اس وقت تھانے کے قریب مسجد میں نماز فجر ادا کی جارہی تھی ، تھانے میں موجود 16 سے 20پولیس اہلکاروں نے حملہ آوروں کو گھیر کر جوابی کارروائی کی۔دو طرفہ فائرنگ کے دوران مسجد میں موجود پانچ نمازی گولیاں لگنے سے جاں بحق ہوگئے۔ اسی دوران دو خود کش حملہ آوروں نے خود کو دھماکے سے اڑالیا۔جبکہ دو خودکش بمبار پولیس کارروائی میں مارے گئے۔بتایا گیا ہے کہ ایک حملہ آور روپوش ہے جس کی تلاش کے لئے سیکیورٹی فورسز نے علاقے کو گھیرے میں لیا ہوا ہے۔ دہشت گردوں کے ساتھ فائرنگ کے تبادلے میں زخمی ہونیوالے 3 اہلکار ڈی ایچ کیو اسپتال میں دم توڑ گئے۔ایس ایچ او سمیت 4 زخمی ہیں۔شدت پسندوں نے ککی تھانے پر حملہ کیا تو مقامی لوگ اور تین دن پہلے چھٹیوں پر گھر آنیوالا فوجی جوان رحیم اللہ بھی اسلحہ لے کر پولیس کی مدد کے لئے پہنچ گئے۔رحیم اللہ نے تقریباً ایک گھنٹے تک پولیس اہل کاروں کے ساتھ شدت پسندوں کا ڈٹ کر مقابلہ کیا اور سینے میں گولی لگنے سے موقع پر ہی شہید ہوگیا۔کالعدم تحریک طالبان نے حملے کی ذمہ داری قبول کرلی ہے ،شدت پسندوں کاہدف تھانہ ککی ، بنوں شہر سے چودہ کلو میٹر فاصلے پر ایف آر کے علاقے جانی خیال اور شمالی وزیرستان سے ملحقہ مضافاتی علاقہ ہے۔ اس سے پہلے اسی سال اپریل میں بنوں سنٹرل جیل پر بھی دہشت گردوں نے حملہ کیا تھا اور متعدد قیدیوں کو چھڑا کر لے گئے تھے۔