لاہور میں شدید دُھند ، ایئر پورٹ صبح 8 بجے تک بند ،کئی پروازیں متاثر

لاہور…لاہور اس وقت سردی کی شدید لپیٹ میں ہے،شہر کے کئی علاقے دُھند کی لپیٹ میں ہیں اور لاہور ایئرپورٹ کو بند کردیا گیا۔ جبکہ بابوصابو سے پنڈی بھٹیاں انٹر چینج تک حد نظر صفر ہونے کے باعث موٹروے بند کردی گئی۔لاہور میں رات ہوتے ہی مختلف علاقوں میں دُھند چھا گئی جس کی وجہ سے موٹر وے کو بند کردیا گیا۔ ترجمان موٹر وے پولیس کا کہنا ہے کہ حدنظر صفر ہونے کے باعث بابوصابو سے پنڈی بھٹیاں انٹر چینج تک موٹروے بند کر دیا گیا ہے، ڈرائیوروں کو ہدایت کی گئی ہے کہ موٹروے پر موجود گاڑیاں قافلوں کی شکل میں سفر کریں اور فوگ لائٹس کا استعمال کریں۔دُھند کے باعث لاہور کے علامہ اقبال انٹرنیشنل کو صبح آٹھ بجے تک کیلئے بند کردیا گیا۔ دُھند کے باعث کوئٹہ سے لاہور آنے والی پرواز پی کے 323 کو اسلام آباد جبکہ اسلام آباد سے آنے والی پرواز کوملتان بھجوادیا گیا۔ نجی ایئرلائن کی پرواز پی اے 404 کوبھی دُھند کے باعث اسلام آباد ایئرپورٹ اتارا گیا۔ لاہور سے جانے والی اندرون اور بیرون ملک پروازوں کو منسوخ کردیا گیا۔ شدید دُھند کے باعث پروازوں کا نیا شیڈول جاری کردیا گیا،تاشقند سے آنے والی غیرملکی ایئرلائن کی پرواز رات 8 بجے کی بجائے صبح 8 بجے آئے گی، جبکہ بارسلونا،دبئی،مسقط اور جدہ سے آنے والی پروازیں بھی صبح 9 بجے کے بعد پہنچیں گی۔