ملکہ برطانیہ کی جعلی کال، آسٹریلوی ریڈیو نے 2 میزبانوں کو کام سے روکدیا

لندن … آسٹریلیوی ریڈیو اسٹیشن سے برطانوی ملکہ اور شہزادہ چارلس کی آواز میں آنے والی جعلی کال وصول کرنے والی نرس کی پراسرار موت کے بعد ریڈیو انتظامیہ نے جعلی کال میں ملوث 2 افراد کو مزید ریڈیو پروگرام کرنے سے روک دیا ہے۔ برطانوی میڈیا کے مطابق جمعہ کی صبح لندن پولیس کو کال موصول ہوئی کہ کنگ ایڈورڈ اسپتال کی ایک نرس بیہوشی کی حالت میں گھر میں موجود ہے، پولیس جب وہاں پہنچی تو نرس مردہ حالت میں پائی گئی۔ میڈیا رپورٹس کے مطابق یہ نرس 4 روز تک شہزادی کیتھرائن مڈل ٹن کے ساتھ اسپتال میں موجود تھی، اس نرس نے آسٹریلوی ریڈیو اسٹیشن کی ایک جعلی کال ان کے کمرے میں وصول کی تھی۔ اسپتال انتظامیہ اور آسٹریلوی ریڈیو کی جانب سے اس واقعے کے بعد معافی بھی مانگ لی گئی تھی اور آسٹریلوی ریڈیو نے کال کرنے والی خاتون آر جے اور ان کے ساتھی کو ریڈیو پر پروگرام کرنے سے روک دیا ہے۔ برطانوی شاہی جوڑے نے نرس کی ہلاکت پرگہرے دکھ کا اظہار کیا ہے جبکہ پولیس کا کہنا ہے کہ ابھی نرس کی موت کی صحیح وجہ معلوم نہیں ہوسکی ہے تاہم اسپتال انتظامیہ نے کسی بھی تبصرے سے گریز کیا ہے۔